Pubblichiamo questa poesia dedicata all'asino, scritta da Roberto Finozzi in dialetto vicentino.

El  muso

 Gavarìa mai pensà che a pena de n’omo

un giorno lontano la scrivesse de mi

a ben vardar so pì  dolse fa  un pomo

par  meritarme na storia cussì:

la sorte benigna che tuti savemo

xè orba asà e vederghe no poe,

na volta ga dito con fare supremo

che l’omo tol sempre su queo ch’el voe.

Questa sentenza, dita in gran tono,

che al me pensar xe masa vioenta,

podaria portarne a poco de bono

parchè l’omo, savemo, no’l s’acontenta.

Mi resto colpio dal fato

che in questo progeto incanìo

ch’el pare vosudo da un mato

ghe sia la mano de Dio.

Me vien da pensar a stò punto

de non distinguer pì la note dal dì

sa penso che in stò xugo presunto

ghe sia coinvolto anca mi.

Questo mi penso parchè nel so fare,

l’omo ca servo e che me custodise

gà sempre sercà de farme portare

na parte de peso che me ‘nfastidise.

El peso en question par dirsela quà,

no penso par questo de fare un abuso,

xe quelo che ‘i ciama  “la civiltà”

che la xe portà da la schena del muso!

Provar rifiutarse questa mansion

ca svolgo pasiente de di e de note,

no penso la sia na liberasion:

ciaparia solamente na carga de bote.

Deso che i tempi xé na s-cianta cambià

vardo a distansa sta rasa de xente

par mi che da un toco i me ga incatenà

so certo che tuti xè malati de mente.

La cura ca deso de sugerir provo

mi spero presto la daga i so fruti

stò omo bestiale ca me ritrovo

l’è parte romai dii  sogni pì bruti!

Chiete e umiltà xé stà le do cose

nel core dei musi da sempre esistie,

sforzarse de ofrirle come fuse do rose

’n t’el giardin de l’amore no saria mai smarie!

 Roberto Finozzi